Rohkos

Skrevet av: , publisert 30.10.2020

Son lei máilmmis, ja máilbmi lei šaddan su bokte, muhto máilbmi ii dovdan su. Son bođii dasa mii gulai sutnje, ja su iežas olbmot eai váldán su vuostá.

Muhto buohkaide geat válde su vuostá, son attii vuoigatvuođa šaddat Ipmila mánnán, buohkaide geat oskot su nammii. 

Sii eai leat riegádan varas eaige rupmaša dáhtus eaige olbmá dáhtus, muhto Ipmilis. 

Joh 1:10-13.

 

Gean birra lea sáhka dás? Mii oažžut vástádusa jus mii lohkat vuosttaš vearssa seammá kapihttalis. Álggus lei Sátni. Sátni lei Ipmila luhtte, ja Sátni lei Ipmil. Son lei álggus Ipmila luhtte. Buot lea šaddan su bokte, ja almmá su haga ii leat šaddan mihkkege das mii lea. 1. Joh 1:3.

 

Son guhte bođii máilmmi beastit, gohčoduvvo maid Sátnin - son lea Jesus. Sus leat máŋggalágan namat main guđesge lea mearkkašupmi. Muhto dás Son lea Sátni. Ja su sánis lea fápmu, dat lea ipmirmeahttun. Go Ipmil sivdnidii máilmmi, de dahkkui dat Sánis, nappo Jesusa bokte.  Ballos Hearrás oppa máilbmi, doarggistehkoset su ovddas buot eatnama ássit.


Son sártnui, ja dat šattai, son gohčui, ja dat dáhpáhuvai
. Sál 33: 8-9. Jesusa sánit leat áibbas earáláganat go min sánit. Su sánit eai leat báidnojuvvon suttolaš jurdagiin, son lea dievvasit buhtis ja almmá suttu haga. Jesus ii sártno dálkki ja biekka ja árvvohis áššiid birra, buot maid Son cealká, lea dehálaš. Ja dan dihtii go lea ealli Sátni, dat sivdnida eallima. Go Sátni sárdnu, de lea Jesus guhte sárdnu. Dan dihtii lea nu dárbbašlaš gullat ja lohkat mii Sánis daddjo. Na mii dasto daddjo Sánis?

Juo, daddjo ahte go dat vuosttaš olmmoš - Adam - gahčai suddui, de dat váikkuha buot olbmuide - danne go buot olbmot leat vuolgán Adamis ja Evas, ja nu čuovvu suttolaš luondu buot olbmuid dego árbi. Mii eat šatta suddolažžan easka go mii álgit suddudit, muhto mii suddudit danne go mis lea suttolaš luondu mielderiegádan. Mii leat riegádan suttolažžan ja dan dihtii mii eat máhte eará go suddudit. Ja Ipmil lea buolli dolla buot suttu vuostá. Dat mearkkaša ahte mii leat láhppon ja Ipmila moari ja duomu vuollásaččat. Nu lei min dilli. Almmatge ii leat nu ahte lea doaivvuhisvuohta.

 

Agálašvuođa rájes lea Ipmil diehtán suddujorraleami birra ja dan dihtii lei sus plána mo Son beastá min. Ipmil lea dievaslaš ja sus ii leat suddu, nu ahte ii mihkkege mii lea suttolaš, ceavzze su lahka. Ja danne go son lea vanhurskkis, de Son ii sáhte gierdat suttu; dat ferte dubmejuvvot. Lei duššefal okta vuohki mo Ipmil sáhtii min gádjut. Son ferte dego álgit ođđasis, ođđa sohkagottiin mas ii leat árbesuddu - ođđa Adam fertii boahtit. Nu de lei ahte Sátni (mii lea Jesus) njiejai vuolás min lusa ja šattai olmmožin. Muhto su varra ii boahtán Adamis, muhto Ipmilis. Dan dihtii sus ii lean suddu.

 

Ja Ipmil bijai buot máilmmi suttu su olggiide ja son šattai givssiduvvot ja bidnašuvvat ja loahpas jápmit ruossajápmima. Ipmil attii su áidnuriegádan Bártnis sudduoaffarin, ja nu suddu oažžu vanhurskkis duomu ja ráŋggáštusa. Ipmila beastinplána min hárrái lea ollašuvvan, ja bestojupmi lea dievaslaš. Dan dihtii daddjo Jesaja girjjis 55:3:

Jorgalehket bealji mu bealláija bohtet mu lusa,guldalehket dárkilit,de beassabehtet eallit!Mun dagan dinguin agálaš lihtuja lohpidan leat oskkáldas,nugo ledjen oskkáldas Davidii.

Go don gulat dáid sániid sárdniduvvomin ja fuomášat ahte dát lea du áidna gáddjojupmi, de don sáhtát bestojuvvot das gos don leat, go giittosin válddát vuostá dan maid Jesus lea dahkan du ovddas. Ja cealkkát mun áiggun gullat dutnje. Dalle don riegádat ođđasis Ipmilis. Vaikko don ain ealát boares oačči siste, de don oaččut ođđa eallima. Čalbmeravkaleamis leat buot du suttut ja meattáhusat jávkan, ja don leat vanhurskkis Ipmila ovddas - Jesusis.

 

 

Tor Magne Haraldseid, kretssekretær Norges Samemisjon   

Oversatt til samisk ved  Rávdná Turi Henriksen

OKDenne siden benytter cookies
Vi bruker informasjonskapsler (cookies) for å bedre din brukeropplevelse. Ved å fortsette å bruke vårt nettsted samtykker du til vår bruk av informasjonskapsler . Detaljer